ОРХОН АЙМГИЙН ЗАСАГ ДАРГЫН ТАМГЫН ГАЗАРТ

Миний ээж Цэрэндамбын Сарантуяа нь Орхон аймгийн Баян-Өндөр сумын Зэст багийн 1 дүгээр микрорайоны 3 дугаар байрны 1 дүгээр орцны 11 тоотод оршин суудаг бөгөөд 1984 оноос хойш Эрдэнэт хотод амьдарч байгаа, тус хотын уугуул иргэдийн нэг юм.

Ээж маань Эрдэнэт хотын бүтээн байгуулалт, хөгжил дэвшилд өөрийн хөдөлмөр, идэвх санаачилгаараа хувь нэмрээ оруулж, олон жилийн турш ажиллаж, амьдарч ирсэн. Тухайлбал, хүүхэд багачуудын ая тухтай орчин, байгаль хамгааллын төлөө санаачилга гарган ажиллаж, Хүүхдийн овоо буюу Цагаан овооны орчныг цэвэрлэх, тохижуулах, мод тарих, худаг бий болгох зэрэг ажлыг өөрийн санаачилгаар хийж, бусдыг уриалан оролцуулж байсан бөгөөд төрийн бус байгууллагуудын үйл ажиллагаанд сайн дураар оролцож, нийгэмдээ өөрийн хувь нэмрийг оруулж ирсэн билээ.

Эрдэнэт хотод 40 гаруй жил амьдарсан, өнөөдөр 64 настай ээж маань одоо тус байрны дээвэр, орц болон орчны тохижилт, аюулгүй байдлын шаардлага хангаагүй нөхцөлд амьдарч байна.

Тодруулбал, 1 дүгээр микрорайоны 3 дугаар байрны 1 дүгээр орцны цонхны шил хагарсан, орц харанхуй, цахилгааны утаснууд ил гарсан, орцны хана, тааз хуучирч муудсан, чийгшил ихтэй, эвгүй үнэртэй болсон байна. Мөн байрны дээврээс ус нэвчиж, улмаар хана, тааз чийгтэн муудаж, цаашид нурж унах эрсдэл үүссэн нөхцөл байдалтай байна.

Түүнчлэн байрны гаднах ногоон байгууламжийн хэсэгт ус тогтож, ургамал, өвс ургаж, арчилгаа үйлчилгээ хангалтгүйгээс орчны эрүүл ахуй, өнгө үзэмжид сөргөөр нөлөөлж байна.

Эдгээр нөхцөл байдал нь тус байранд амьдарч буй ахмад настан болон бусад оршин суугчдын эрүүл мэнд, аюулгүй байдал, амьдрах орчны тав тухад сөргөөр нөлөөлж болзошгүй байна. Ялангуяа миний ээжийн эрүүл мэндийн байдал муудаж, одоогоор эмнэлэгт хэвтэн эмчлүүлж байгаа бөгөөд цаашид гэртээ эрүүл, аюулгүй, тав тухтай орчинд амьдрах нөхцөлийг бүрдүүлэх нь нэн чухал байна.

Иймд дээрх нөхцөл байдлыг холбогдох мэргэжлийн байгууллагаар газар дээр нь яаралтай үзлэг шалгалт хийлгэж, оршин суугчдын эрүүл мэнд, аюулгүй байдалд учирч болзошгүй эрсдэлийг үнэлэн, шаардлагатай арга хэмжээг шуурхай авч өгөхийг хүсье.

Үүнд:

1 дүгээр микрорайоны 3 дугаар байрны дээврээс ус нэвчиж буй шалтгааныг тогтоож, дээврийн засвар, ус тусгаарлалтын ажлыг хийх;

Дээврээс ус нэвчсэний улмаас гэмтэж, чийгтэж муудсан хана, тааз болон бусад хэсгийг засварлах;

Байрны орцны хагарсан цонхыг засварлах, орцны гэрэлтүүлэг болон цахилгааны ил гарсан утас, монтажийг шалгаж, аюулгүй байдлыг хангах;

Чийгшил, эвгүй үнэрийн шалтгааныг тогтоож, эрүүл ахуйн шаардлага хангасан орчин бүрдүүлэх;

Байрны гаднах ногоон байгууламж, ус тогтсон хэсэг болон орчны арчилгаа, тохижилтыг сайжруулах;

Тус байрны ахмад настан болон нийт оршин суугчдын амь нас, эрүүл мэндэд эрсдэл учруулж болзошгүй нөхцөл байдлыг яаралтай арилгах;

Шаардлагатай засвар үйлчилгээг Эрдэнэт хотын 50 жилийн ойн хүрээнд хэрэгжүүлэх бүтээн байгуулалт, тохижилтын ажлын төлөвлөгөөнд тусган шийдвэрлэх боломжийг судалж, яаралтай арга хэмжээ авч өгөх.

Монгол Улсын Үндсэн хуульд иргэн эрүүл, аюулгүй орчинд амьдрах эрхтэй болохыг баталгаажуулсан байдаг. Иймд Эрдэнэт хотын хөгжил, бүтээн байгуулалтад олон жилийн турш хөдөлмөрлөж, хувь нэмрээ оруулсан ахмад иргэдийн амьдрах орчин, эрүүл мэнд, аюулгүй байдлыг анхаарч, дээрх асуудлыг холбогдох байгууллагуудтай хамтран яаралтай шийдвэрлэж өгөхийг хүндэтгэн хүсье.

Мөн гаргасан гомдол, хүсэлтийг хэрхэн шийдвэрлэсэн талаар болон цаашид авах арга хэмжээний талаар бичгээр хариу өгнө үү.

Хүндэтгэсэн,

Өргөдөл гаргагч: Э.Уянга